PIMPRI: हॉटेलमध्ये जेवत असताना वेटरच्या हाताचे पाणी ताटात पडल्याचा जाब विचारणे एका ग्राहकाला चांगलेच महागात पडले आहे. या किरकोळ कारणावरून हॉटेल मधील कर्मचाऱ्यांनी ग्राहकाला शिवीगाळ करत मारहाण केली आणि त्या नंतर चाकूने वार करून जखमी केले. ही खळबळजनक घटना पिंपरीतील जायका चौक येथील ‘हॉटेल कराची भवन’ येथे मंगळवारी (२३ डिसेंबर) सायंकाळी घडली
PIPMRI हॉटेल नेमकी घटना काय?
फिर्यादी आशुतोष पांडुरंग काटे (वय ३३, रा. पिंपळे सौदागर) हे त्यांचे मित्र विजय उपाध्याय यांच्यासह मंगळवारी सायंकाळी ४:५० च्या सुमारास कराची भवन हॉटेलमध्ये जेवण करत होते. यावेळी टेबलवरील टिशू पेपर घेताना वेटरच्या ओल्या हाताचे पाणी आशुतोष यांच्या जेवणाच्या ताटात पडले. आशुतोष यांनी वेटरला “दुसरीकडून टिशू पेपर घे” असे मज्जाव केला.
या साध्या बोलण्याचा राग आल्याने वेटरने काउंटरवर बसलेला विशाल आणि त्याचा साथीदार मोनू बहोत यांना बोलावून घेतले. या दोघांनी आशुतोष यांना काहीही न बोलता अश्लील शिवीगाळ करण्यास सुरुवात केली. वादाचे रूपांतर हाणामारीत झाले आणि मोनू बहोत याने किचन मधील कांदा कापण्याचा स्टीलचा चाकू आणून आशुतोष यांच्या नाकावर जोरात वार केला. या हल्ल्यात आशुतोष गंभीर जखमी झाले आहेत.
पोलीस कारवाई
याप्रकरणी आशुतोष काटे यांनी पिंपरी पोलीस ठाण्यात तक्रार दिली आहे. पोलिसांनी दिलेल्या माहितीनुसार:
- आरोपी: १. विशाल, २. मोनू बहोत (दोघांचा पूर्ण पत्ता शोध सुरू आहे).
- गुन्हा नोंद: दि. २३/१२/२०२५ रोजी रात्री उशिरा (००:२४ वाजता).
- कलमे: भारतीय न्याय संहिता (BNS) कलम ११८ (१) (धोकादायक शस्त्राने दुखापत करणे), ११५ (२) (स्वेच्छेने दुखापत करणे), ३५२ (शांतता भंग करण्याच्या उद्देशाने अपमान), आणि ३(५) (समान हेतू) नुसार गुन्हा दाखल करण्यात आला आहे.
पिंपरी पोलीस या प्रकरणाचा अधिक तपास करत असून फरार आरोपींचा शोध घेत आहेत. भरवस्तीत आणि हॉटेलमध्ये अशा प्रकारे शस्त्राने हल्ला झाल्याने परिसरात भीतीचे वातावरण पसरले आहे.
