पुणे शहर प्रतिनिधी: पुणे महानगरपालिका निवडणुकीत (PMC Election) उमेदवारी न मिळाल्याने नाराज झालेल्या कार्यकर्त्यांची नाराजी कमी करण्यासाठी विविध राजकीय पक्षांकडून ‘स्वीकृत नगरसेवक’ पदांचे आश्वासन देण्यात आले होते. मात्र, शासनाने निश्चित केलेल्या कोट्यामुळे आता हीच आश्वासने पक्षनेत्यांसाठी अडचणीची ठरण्याची चिन्हे दिसू लागली आहेत.(PMC Election Result 2026)
नियमांनुसार भाजपला सात, राष्ट्रवादी काँग्रेस ला दोन, तर काँग्रेसला केवळ एकच स्वीकृत नगरसेवक पद मिळणार आहे. इच्छुकांची संख्या मोठी असताना उपलब्ध जागा मर्यादित असल्याने, पक्षांतर्गत नाराजी आणि असंतोष पुन्हा उफाळून येण्याची शक्यता राजकीय वर्तुळात व्यक्त केली जात आहे.
राजकीय पुनर्वसनाचा ‘मार्ग’
महानगरपालिकेच्या कारभारात विविध क्षेत्रांतील तज्ज्ञ, सामाजिक कार्यकर्ते तसेच स्वयंसेवी संस्थांचे प्रतिनिधी सहभागी व्हावेत, या हेतूने स्वीकृत नगरसेवक पदाची तरतूद करण्यात आली आहे. मात्र प्रत्यक्ष व्यवहारात ही पदे अनेकदा निवडणुकीत डावललेल्या किंवा नाराज झालेल्या कार्यकर्त्यांच्या राजकीय पुनर्वसनाचे साधन म्हणून वापरली जात असल्याचे चित्र स्पष्टपणे दिसते. (PMC Election Result 2026)
स्वीकृत नगरसेवकांना सभागृहात मतदानाचा अधिकार नसतो, तसेच त्यांची कोणत्याही अन्य वैधानिक पदावर नियुक्ती करता येत नाही. तरीदेखील त्यांच्या कामांसाठी अर्थसंकल्पात स्वतंत्र तरतूद करण्यात येत असल्यामुळे, या पदांकडे अनेक जण ‘सन्मानजनक प्रवेशद्वार’ म्हणून पाहतात. परिणामी, या पदांभोवती राजकीय अपेक्षा आणि दबाव वाढताना दिसत आहेत. (PMC Election Result 2026)
नेतृत्वासमोरील कसरत वाढणार
यंदाच्या पुणे महानगरपालिका निवडणुकीत एकूण १६५ नगरसेवक निवडून आले आहेत. उमेदवारी वाटपाच्या टप्प्यावर, विशेषतः भाजपमध्ये इच्छुकांची संख्या मोठ्या प्रमाणात असल्याचे चित्र होते. तिकीट न मिळाल्याने काही इच्छुकांनी बंडखोरी करत अपक्ष उमेदवारी दाखल केली होती. त्या वेळी वरिष्ठ नेत्यांनी समजूत काढत भविष्यात स्वीकृत नगरसेवक पद, वृक्ष प्राधिकरण समिती सदस्यत्व किंवा प्रभागस्तरीय स्वीकृत सदस्यपद देण्याची आश्वासने दिली होती.
आता नियुक्त्यांची प्रक्रिया जवळ येत असताना, उपलब्ध जागा मर्यादित असल्यामुळे कोणाला प्राधान्य द्यायचे आणि कोणाला डावलायचे, हा कठीण प्रश्न पक्षनेतृत्वासमोर उभा ठाकणार आहे. यामुळे अंतर्गत समन्वय राखणे हे नेत्यांसाठी मोठे आव्हान ठरण्याची शक्यता आहे. (PMC Election Result 2026)
सभागृहातील पक्षीय ताकद
पुणे महानगरपालिका सभागृहातील सद्यस्थितीत पक्षीय संख्याबळ पुढीलप्रमाणे आहे —
- भाजप: ११९
- राष्ट्रवादी काँग्रेस: २७
- राष्ट्रवादी काँग्रेस (शरदचंद्र पवार गट): ३
- काँग्रेस: १५
- शिवसेना (उद्धव बाळासाहेब ठाकरे): १
- एकूण: १६५
मर्यादित संख्येतील स्वीकृत नगरसेवक पदांमुळे अनेक इच्छुकांचा अपेक्षाभंग अटळ ठरणार की पक्षनेतृत्व समतोल साधत नाराजी रोखण्यात यशस्वी ठरणार, याकडे आता पुण्याच्या राजकीय वर्तुळाचे बारकाईने लक्ष लागले आहे.
