पिंपरी-चिंचवड : भोसरी आणि चाकण या औद्योगिक भागांमध्ये रोजगाराच्या शोधात येणाऱ्या हजारो युवक-युवतींसाठी एक दिलासादायक उपक्रम सुरू करण्यात आला आहे. नोकरीच्या नावाखाली होणारी फसवणूक थांबवणे आणि योग्य मार्गदर्शन उपलब्ध करून देणे या उद्देशाने ‘महापौर युवा संकल्प रोजगार, कौशल्य विकास व करिअर मार्गदर्शन केंद्र’ कार्यान्वित झाले आहे.
फसवणूक रोखण्यासाठी महत्त्वाचे पाऊल; पूर्णपणे मोफत सेवा उपलब्ध
महापौर रवि बाबासाहेब लांडगे यांच्या पुढाकारातून भोसरी आणि चाकण येथे ही केंद्रे सुरू करण्यात आली आहेत. भोसरीतील संविधान चौकाजवळील फुगे प्रायमा येथे या केंद्राचे उद्घाटन करण्यात आले. या केंद्रामध्ये युवक-युवतींना नोंदणीपासून नोकरी मिळेपर्यंत सर्व प्रकारचे मार्गदर्शन पूर्णपणे मोफत दिले जाते. यामध्ये जॉब अपडेट्स, कंपन्यांशी संपर्क, करिअर काउन्सेलिंग तसेच राहण्याबाबत मार्गदर्शन यांचा समावेश आहे.
भोसरी चाकण सर्व शैक्षणिक पात्रतेसाठी संधी; हजारो युवकांना फायदा
या उपक्रमाचा लाभ दहावी, बारावी, आयटीआय, डिप्लोमा, इंजिनिअरिंग तसेच कला, वाणिज्य आणि विज्ञान शाखेतील पदवीधर युवक-युवती घेऊ शकतात. आर्थिक अडचणींमुळे मागे राहणाऱ्या आणि कौशल्य असूनही संधी न मिळालेल्या तरुणांसाठी हे केंद्र मोठा आधार ठरत आहे. आतापर्यंत जवळपास दोन हजार युवक-युवतींनी या केंद्राचा लाभ घेतला असून, भविष्यात आणखी मोठ्या प्रमाणावर युवकांना रोजगाराच्या संधी उपलब्ध होण्याची अपेक्षा आहे.
महापौर लांडगे यांनी सांगितले की, बाहेरून शहरात येणाऱ्या अनेक तरुणांना राहण्यापासून ते नोकरीपर्यंत अनेक अडचणींना सामोरे जावे लागते. याच परिस्थितीचा फायदा घेऊन काही एजंट आर्थिक फसवणूक करतात. हा अन्याय थांबवण्यासाठी ‘विनामूल्य नोकरी’ या संकल्पनेवर आधारित हा उपक्रम सुरू करण्यात आला आहे.
भोसरीतील संविधान चौक, फुगे प्रायमा (A विंग, तिसरा मजला, ऑफिस क्र. 12) तसेच चाकण येथील कॅपिटल स्क्वेअर येथे ही केंद्रे कार्यरत आहेत. युवकांनी कोणताही आर्थिक खर्च न करता या सुविधांचा लाभ घ्यावा आणि आपल्या करिअरला योग्य दिशा द्यावी, असे आवाहन करण्यात आले आहे.
